मूल : सतीश आकुलवार (मुख्य संपादक)
चंद्रपूर जिल्ह्यातील मूल शहरात धक्कादायक घटना घडली आहे. मूल येथील नवभारत विद्यालयासमोरील गेटच्या बाजूला असलेल्या एका दुकानासमोर मंदबुद्धी महिलेवर अज्ञात नराधमाने बलात्कार केल्याची घटना उघडकीस आली आहे. ही घटना रात्री अंदाजे १ वाजताच्या सुमारास घडली.
मिळालेल्या माहितीनुसार, नवभारत विद्यालय परिसरात एका दुकानासमोर झोपलेल्या मंदबुद्धी महिलेवर अज्ञात व्यक्तीने अत्याचार केला. दरम्यान परिसरातील काही सुज्ञ नागरिकांच्या हा प्रकार लक्षात येताच त्यांनी आरडाओरडा केला. नागरिकांचा आवाज ऐकताच आरोपी घटनास्थळावरून पळ काढून पसार झाला.
घटनेची माहिती मिळताच पोलिसांनी तात्काळ घटनास्थळी धाव घेतली. पीडित महिलेला उपचारासाठी रुग्णालयात दाखल करण्यात आले असून तिची वैद्यकीय तपासणी करण्यात येत आहे.
दरम्यान, पोलिसांनी अज्ञात आरोपीविरुद्ध गुन्हा दाखल करून त्याचा शोध सुरू केला असून परिसरातील सीसीटीव्ही फुटेजच्या आधारे तपास सुरू असल्याची माहिती मिळत आहे. या घटनेमुळे मूल शहरात संतापाचे वातावरण निर्माण झाले आहे.
मुख्य संपादक; सतीश आकुलवार
