मूल : सतीश आकुलवार (मुख्य संपादक)
मूल तालुक्याच्या धार्मिक आणि सांस्कृतिक वैभवाचे प्रतीक असलेल्या ऐतिहासिक सोमनाथ मंदिराला अखेर ‘तीर्थक्षेत्र-ब’ दर्जा मिळाला आहे. राज्य सरकारकडून झालेला हा महत्त्वाचा निर्णय हा राज्याचे माजी वने, सांस्कृतिक कार्य व मत्स्यव्यवसाय मंत्री तथा स्थानिक आमदार सुधीर मुनगंटीवार यांच्या ठोस पाठपुराव्याचा परिणाम असल्याचे स्पष्ट होत आहे.
सोमनाथ मंदिर परिसराचा धार्मिक, सांस्कृतिक तसेच पर्यटन दृष्टिकोनातून विकास व्हावा, परिसराला योग्य ओळख मिळावी तसेच स्थानिकांसाठी रोजगाराच्या नव्या संधी उपलब्ध व्हाव्यात, या उद्देशाने आमदार मुनगंटीवार यांनी गेल्या अनेक वर्षांपासून सातत्याने पाठपुरावा केला होता. अखेर त्यांच्या प्रयत्नांना यश मिळत ‘तीर्थक्षेत्र ब’ दर्जाची घोषणा करण्यात आली.
या निर्णयामुळे सोमनाथ मंदिर परिसरात नियोजित व वेगवान विकासाचे नवे पर्व सुरू होणार आहे. तीर्थक्षेत्र दर्जामुळॆ मंदिर परिसरात मूलभूत सुविधा उभारणी, पर्यटक केंद्र, सौंदर्यीकरण, आधुनिक सुविधा, पार्किंग, स्वच्छता व्यवस्था तसेच धार्मिक पर्यटनाच्या दृष्टीने आकर्षक प्रकल्प उभारले जाणार आहेत. या उपक्रमांचा थेट फायदा स्थानिकांना रोजगाराच्या स्वरूपात मिळण्याची अपेक्षा व्यक्त केली जात आहे.
‘ब’ दर्जा मिळाल्यानंतर शासनस्तरावरून विशेष निधी मंजुरी, विकास आराखड्याची अंमलबजावणी आणि पर्यटन वाढीसाठी स्वतंत्र योजना राबविण्यात येणार आहेत. यामुळे सोमनाथ मंदिर प्रदेश धार्मिक नकाशावर अधिक ठळकपणे झळकणार असून, मूल तालुक्याच्या सर्वांगीण विकासाला गती मिळणार आहे.
या निर्णयाचे स्वागत करत तालुक्यातील नागरिक, विविध सामाजिक संस्था आणि श्रद्धाळूंनी समाधान व्यक्त केले आहे. मंदिराला मिळालेला हा मान मूल तालुक्याच्या विकासासाठी ऐतिहासिक ठरणार असल्याचा विश्वास स्थानिक नागरिकांनी व्यक्त केला आहे.
मुख्य संपादक; सतीश आकुलवार
