मूल : सतीश आकुलवार (मुख्य संपादक)
मूल शहरात घरगुती गॅस सिलेंडरचा मोठ्या प्रमाणात गैरवापर होत असल्याचे धक्कादायक चित्र समोर येत आहे. शहरातील अनेक हॉटेल, ढाबे आणि खाद्य व्यवसायिकांकडून व्यावसायिक गॅसऐवजी घरगुती गॅस सिलेंडरचा सर्रास वापर केला जात असल्याचे दिसून येत आहे. मात्र या गंभीर प्रकाराकडे प्रशासनाचे दुर्लक्ष होत असल्याची चर्चा नागरिकांमध्ये सुरू आहे.
एकीकडे सामान्य नागरिकांना घरगुती गॅस सिलेंडर मिळण्यात अडचणी येत आहेत, वेळेवर सिलेंडर उपलब्ध होत नाहीत, तर दुसरीकडे व्यावसायिक ठिकाणी मोठ्या प्रमाणात याच गॅसचा वापर होत असल्याने संताप व्यक्त केला जात आहे.
घरगुती गॅस हा केवळ घरगुती वापरासाठी अनुदानित दरात दिला जातो. परंतु काही व्यावसायिक स्वतःचा खर्च वाचवण्यासाठी या गॅसचा गैरवापर करत असल्याचे स्पष्ट होत आहे. यामुळे शासनाचा महसूलही बुडत असून, खऱ्या गरजूंना गॅस मिळण्यात अडथळे निर्माण होत आहेत.
नागरिकांनी संबंधित प्रशासन आणि अन्न व नागरी पुरवठा विभागाने तातडीने याकडे लक्ष देऊन अशा गैरप्रकारांवर कारवाई करण्याची मागणी केली आहे. तसेच शहरात तपासणी मोहीम राबवून दोषींवर कठोर कारवाई करावी, अशीही मागणी होत आहे.
प्रशासन कारवाई करणार का?
हा प्रश्न आता मूल शहरातील सर्वसामान्य नागरिक विचारत असून, येत्या काळात प्रशासन यावर काय भूमिका घेते हे पाहणे महत्त्वाचे ठरणार आहे.
मुख्य संपादक; सतीश आकुलवार
