चंद्रपूर : सतीश आकुलवार (मुख्य संपादक)
दिवाळीसारख्या सणासुदीच्या काळात शहरात मोठा घातपात घडविण्याचा कट रचला जात असतानाच चंद्रपूर पोलिसांनी अत्यंत धाडसी कारवाई करत तो उधळून लावला. पोलिसांनी २ माऊझर गन (पिस्टल), २ देशी कट्टे, ३५ जिवंत काडतुसे व ४ खंजर असा तब्बल ₹१७ लाख ४५ हजारांचा शस्त्रसाठा जप्त केला असून, चार संशयितांना अटक करण्यात आली आहे.
अटक करण्यात आलेले आरोपी म्हणजे —
चन्द्रेश उर्फ छोटू देसराज सूर्यवंशी,
बोरिस श्रीनिवास कुसुमा,
मुकेश राजू वर्मा उर्फ टँक्यु,
अमित बाडूकराम सोनकर (सर्व रा. बल्लारपूर).
लक्ष्मीपूजनाच्या पूर्वसंध्येला पोलिसांना माहिती मिळाली होती की, काही व्यक्ती देशी कट्टा घेऊन शहरात येणार आहेत. या माहितीच्या आधारे शहर पोलिसांनी गंजवार्ड परिसरातील दादामिया ट्रान्सपोर्टसमोर सापळा रचला. रात्री दोन चारचाकी व एक दुचाकी वाहनातून आठ जण आले असता पोलिसांनी तत्परतेने कारवाई करत चार जणांना पकडले, तर इतर चार जण पसार झाले.
वाहनांची तपासणी केली असता २ देशी कट्टे, २ माऊझर गन, ३५ जिवंत काडतुसे व ४ खंजर असा धक्कादायक शस्त्रसाठा आढळून आला. पोलिसांनी तत्काळ आरोपींविरुद्ध भारतीय हत्यार कायद्यान्वये गुन्हा दाखल केला असून फरार आरोपींचा शोध सुरू आहे.
ही कारवाई पोलिस अधीक्षक मुम्मका सुदर्शन, अपर पोलिस अधीक्षक ईश्वर कातकडे, उपविभागीय पोलिस अधिकारी प्रमोद चौगुले यांच्या मार्गदर्शनाखाली, शहर पोलिस ठाण्याचे पोलिस निरीक्षक निशीकांत रामटेके यांच्या नेतृत्वात सहाय्यक पोलिस निरीक्षक राजेंद्र सोनवण, पोलिस उपनिरीक्षक दत्तात्रय कोलटे, विलास निकोडे, हवालदार लक्ष्मण रामटेके, संजय धोटे, इमरान शेख आदींनी केली.
मुख्य संपादक; सतीश आकुलवार
