मूल : सतीश आकुलवार (मुख्य संपादक)
मूल येथील आदर्श शेतकी खरेदी-विक्री सहकारी सोसायटीची पंचवार्षिक निवडणूक नुकतीच शांततेत व उत्साहात पार पडली. ही निवडणूक काँग्रेस नेते तथा प्रदेश काँग्रेसचे महासचिव, माजी जिल्हा परिषद अध्यक्ष आणि चंद्रपूर जिल्हा मध्यवर्ती सहकारी बँकेचे माजी अध्यक्ष संतोषसिंह रावत यांच्या नेतृत्वाखाली अविरोध करण्यात आली.
यामध्ये अध्यक्षपदी घनश्याम येनुरकर तर उपाध्यक्षपदी राजू पाटील मारकवार यांची सर्वानुमते निवड करण्यात आली. तसेच संचालक मंडळात न.प. उपाध्यक्ष व कृषी उत्पन्न बाजार समिती सभापती राकेश रत्नावार, उपसभापती राजेंद्र कन्नमवार, विविध सहकारी संस्थांचे अध्यक्ष संदीप कारमवार, प्रायमरी सोसायटी अध्यक्ष धनंजय चिंतावार, रुमदेव गोहने, माजी जिल्हा परिषद सदस्या मंगला आत्राम, स्मिता कामडे, गणेश खोब्रागडे, जीवराज ठेमस्कर यांचीही अविरोध निवड झाली.
नवनिर्वाचित अध्यक्ष घनश्याम येनुरकर व उपाध्यक्ष राजू पाटील मारकवार यांनी मनोगत व्यक्त करताना सांगितले की, “शेतकऱ्यांच्या हितासाठी आम्ही सातत्याने काम करू. त्यांना योग्य दरात खत, बियाणे व कीटकनाशके उपलब्ध करून देण्यासाठी आम्ही कायम त्यांच्या पाठीशी उभे राहू.”
दरम्यान, काँग्रेस कमिटीच्या वतीने नवनिर्वाचित पदाधिकाऱ्यांचा सत्कार करण्यात आला. प्रमुख अतिथी म्हणून नगराध्यक्ष एकता समर्थ, तालुका अध्यक्ष गुरु गुरनुले, शहर अध्यक्ष सुनील शेरकी, न.प. बांधकाम सभापती प्रशांत समर्थ, महिला अध्यक्षा रुपाली संतोषवार यांनी पुष्पगुच्छ देऊन अभिनंदन केले.
नगराध्यक्ष एकता समर्थ यांनी पुढील वाटचालीसाठी शुभेच्छा दिल्या, तर तालुका अध्यक्ष गुरु गुरनुले यांनी स्थानिक स्वराज्य संस्थांमध्ये काँग्रेस पक्षाची भूमिका यावर मार्गदर्शन केले. कार्यक्रमाचे संचालन सुनील शेरकी यांनी केले तर आभार प्रदर्शन महिला शहर अध्यक्षा नलिनी आडपवार यांनी मानले.
यावेळी मंचावर मावळते अध्यक्ष पुरुषोत्तम भुरसे, उपाध्यक्ष विनोद गाजेवार, नगर परिषद सभापती, नगरसेवक, सरपंच, काँग्रेस पदाधिकारी, बाजार समिती संचालक व कार्यकर्ते मोठ्या संख्येने उपस्थित होते.
मुख्य संपादक; सतीश आकुलवार
