मूल : सतीश आकुलवार (मुख्य संपादक)
चंद्रपूर महानगरपालिकेतील उमेदवार अदलाबदली प्रकरणामुळे भारतीय जनता पार्टीने महानगर अध्यक्षांवर थेट कारवाई करत कडक संदेश दिला. या पार्श्वभूमीवर आता मूल नगर परिषद निवडणुकीतील उमेदवार बदलाच्या प्रकरणाची शहरात जोरदार चर्चा रंगली आहे.
मूलमध्ये निवडणुकीदरम्यान काही प्रभागांमध्ये उमेदवारांची नावे बदलल्याने पक्षांतर्गत नाराजी उफाळून आली होती, आणि भाजपा चा दारुण पराभव झाला होता. स्थानिक पातळीवर घेतलेल्या निर्णयांमुळे पक्षशिस्त धोक्यात आली का, तसेच या बदलांमागे कोणाची भूमिका होती, याबाबत कार्यकर्त्यांमध्ये संभ्रम आहे. त्यामुळे चंद्रपूरप्रमाणेच मूलमध्येही संबंधित पदाधिकाऱ्यांवर कारवाई होणार का, असा प्रश्न उपस्थित होत आहे.
सूत्रांच्या माहितीनुसार, पक्षाचे जिल्हा व विभागीय नेतृत्व या प्रकरणाकडे बारकाईने लक्ष ठेवून आहे. चंद्रपूरमध्ये दाखवलेल्या कडक भूमिकेची पुनरावृत्ती करून पक्षशिस्तीचा संदेश देण्यात येतो का, याकडे सर्वांचे लक्ष लागले आहे.
दरम्यान, अधिकृत पातळीवर अद्याप कोणतीही घोषणा झालेली नसली, तरी “चौकशी सुरू आहे” अशी दबक्या आवाजात चर्चा आहे. त्यामुळे मूलमधील भाजप कार्यकर्ते आणि पदाधिकारी नेतृत्वाच्या निर्णयाची प्रतीक्षा करत असून, येत्या काही दिवसांत घडामोडींना वेग येण्याची शक्यता व्यक्त केली जात आहे.
मुख्य संपादक; सतीश आकुलवार
