चंद्रपूर : सतीश आकुलवार (मुख्य संपादक)
चंद्रपूर येथील शेतकरी रोशन कुडे यांनी सावकाराकडून अवघे एक लाख रुपये कर्ज घेतले होते. मात्र सावकारांच्या अवाजवी व्याजामुळे ही रक्कम तब्बल ७४ लाखांपर्यंत पोहोचली, आणि अखेर कर्जफेडीसाठी किडनी विकण्याची वेळ त्यांच्यावर आली. ही घटना अत्यंत धक्कादायक असून, अशा प्रकारे शेतकऱ्यांना धमकावून किडनी विकण्यास भाग पाडणारे मोठे रॅकेट महाराष्ट्रात सक्रिय असल्याचा गंभीर आरोप काँग्रेसचे विधिमंडळ नेते विजय वडेट्टीवार यांनी केला आहे.
वडेट्टीवार म्हणाले की, “सरकारने केवळ SIT नेमली तरी ते पुरेसे नाही. शेतकऱ्यांना छळून पैसे लुबाडणाऱ्या सावकारांचे संघटित रॅकेट राज्यभर कार्यरत आहे. विदर्भ आणि मराठवाडा भागात वरिष्ठ आयपीएस अधिकाऱ्यांच्या नेतृत्वाखाली स्वतंत्र विशेष पथके स्थापन करून या रॅकेटचा पर्दाफाश केला पाहिजे.”
सरकारवर घणाघाती टीका
महायुती सरकारच्या धोरणांमुळे शेतकऱ्यांवर अशी वेळ आल्याचा आरोप करत वडेट्टीवार म्हणाले, “या सरकारने शेतकऱ्यांना उद्ध्वस्त केले आहे. कर्जबाजारीपणामुळे शेतकरी आत्महत्येऐवजी आता अवयव विकण्यापर्यंत मजल मारत आहे, ही राज्यासाठी लाजिरवाणी बाब आहे.”
सोशल मीडियातून रॅकेट सक्रिय?
या प्रकरणामागे डॉक्टर, एजंट आणि मध्यस्थ यांचा सहभाग असण्याची शक्यता व्यक्त करत वडेट्टीवार यांनी सांगितले की, “किडनी विक्रीचे रॅकेट सोशल मीडियाच्या माध्यमातूनही सक्रिय असू शकते. याची सखोल चौकशी झाली पाहिजे. दोषी कोणीही असो, त्यांच्यावर कठोर कारवाई झाली पाहिजे.”
या प्रकरणाची व्यापक आणि निष्पक्ष चौकशी करून शेतकऱ्यांना न्याय मिळवून देण्याची मागणी करत, सावकारशाहीविरोधात कडक पावले उचलण्याचे आवाहनही त्यांनी केले आहे.
मुख्य संपादक; सतीश आकुलवार
