मूल : सतीश आकुलवार (मुख्य संपादक)
प्रतिबंधित सुगंधित तंबाखूची साठवणूक करून विक्री केली जात असल्याची गोपनीय माहिती मिळाल्यानंतर मूल पोलिसांनी मोजा डोंगरगाव येथे छापा टाकून मोठी कारवाई केली. या कारवाईत एकूण ५६ हजार ४५० रुपयांचा प्रतिबंधित तंबाखू मुद्देमाल जप्त करण्यात आला असून एका व्यक्तीवर गुन्हा दाखल करण्यात आला आहे.
पोलीसांकडून मिळालेल्या माहितीनुसार, दिनांक ८ फेब्रुवारी २०२६ रोजी रात्री सुमारे १०.३० वाजताच्या दरम्यान ही कारवाई करण्यात आली. डोंगरगाव येथे राहणारे राजेंद्र उद्धव बोबाटे (वय ४५ वर्षे) यांच्या घरी छापा टाकण्यात आला. घराची झडती घेतली असता विविध कंपन्यांचा प्रतिबंधित सुगंधित तंबाखू मोठ्या प्रमाणात आढळून आला.
या कारवाईत विविध प्रकारच्या प्लास्टिक पॅकेटमधील तंबाखू जप्त करण्यात आला असून एकूण मुद्देमालाची किंमत ५६,४५० रुपये इतकी आहे. या प्रकरणी मूल पोलीस स्टेशन येथे संबंधित आरोपीविरुद्ध कलम २२३, २७४, २७५ भा.दं.वि. तसेच अन्नसुरक्षा मानके अधिनियम अंतर्गत गुन्हा नोंद करण्यात आला आहे.
ही कारवाई पोलीस अधीक्षक, अपर पोलीस अधीक्षक व उपविभागीय पोलीस अधिकारी यांच्या मार्गदर्शनाखाली मूल पोलीस स्टेशनचे अधिकारी व कर्मचारी यांनी केली. सदर गुन्ह्याचा पुढील तपास पोलीस करत आहेत.
मुख्य संपादक; सतीश आकुलवार
