मूल : सतीश आकुलवार (मुख्य संपादक)
मूल तालुक्यातील डोंगरगाव रेतीघाटावरून मध्यरात्रीच्या सुमारास अवैध रेतीची तस्करी धडाक्यात सुरू असल्याचे समोर आले आहे. मोठ्या प्रमाणात ट्रॅक्टरच्या साहाय्याने रेती उपसा करून ती विविध ठिकाणी अवैधरित्या विक्री केली जात असल्याची माहिती स्थानिक ग्रामस्थांनी दिली आहे.
राजोली आणि डोंगरगाव येथील काही रेती तस्करांचा या व्यवसायात सहभाग असल्याचे समजते. विशेष म्हणजे, या तस्करीदरम्यान कोणतेही अधिकृत दस्तऐवज नसतानाही वाहतूक केली जात असल्यामुळे शासनाच्या महसुलाचे मोठे नुकसान होत आहे.
लिलाव झालेले घाट अद्याप सुरू नाहीत – तस्करांना संधी
या हंगामासाठी काही रेतीघाटांचे लिलाव झाले असले तरी अद्याप अधिकृत उपसा सुरू न झाल्याने अवैध रेती वाहतूक करणाऱ्यांचे दिवस सुगीचे ठरले आहेत. स्थानिक रहिवाशांच्या मते, अधिकृत प्रणाली सुरू होण्यापूर्वीच रेती तस्करांनी मोठ्या प्रमाणात रेती उपसा करून साठवणूक सुरू केली आहे.
प्रशासनाचे दुर्लक्ष की संगनमत?
या परिसरात रात्रीच्या वेळी ना तपासणी पथक दिसते, ना कोणतीही कारवाई होताना जाणवते. त्यामुळे महसूल विभाग, खनिकर्म शाखा आणि पोलिस प्रशासनावर प्रश्नचिन्ह निर्माण झाले आहे.
मुख्य संपादक; सतीश आकुलवार
