मुंबई : (विशेष प्रतिनिधी)
भारतीय संगीतविश्वाला मोठा धक्का बसला असून ज्येष्ठ गायिका आशा भोसले यांचे आज दुःखद निधन झाले. वयाच्या 93 व्या वर्षी त्यांनी अखेरचा श्वास घेतला. गेली तब्बल सात दशके आपल्या सुरांनी रसिकांच्या मनावर अधिराज्य गाजवणाऱ्या आशाताईंच्या जाण्याने एका युगाचा अंत झाल्याची भावना व्यक्त होत आहे.
मिळालेल्या माहितीनुसार, काल संध्याकाळी त्यांना हृदयविकाराचा झटका आला होता. त्यानंतर त्यांना तातडीने मुंबईतील ब्रीच कॅन्डी रुग्णालयात दाखल करण्यात आले. त्यांच्या प्रकृतीत सुधारणा होईल अशी अपेक्षा व्यक्त केली जात होती, मात्र उपचारादरम्यान त्यांनी आज अखेरचा श्वास घेतला.
आशा भोसले यांनी हिंदीसह मराठी, बंगाली, गुजराती, पंजाबी, तमिळ, तेलुगू अशा विविध भाषांमध्ये तब्बल 12 हजारांहून अधिक गाणी गाऊन संगीतसृष्टीत अमूल्य ठेवा निर्माण केला. त्यांचा मधुर, लवचिक आणि भावपूर्ण आवाज पिढ्यानपिढ्या रसिकांच्या हृदयात घर करून राहिला आहे.
गझल, पॉप, भक्तिगीत, चित्रपटगीत अशा विविध प्रकारांमध्ये त्यांनी आपली वेगळी छाप पाडली. त्यांच्या गायकीतली विविधता आणि ऊर्जा यामुळे त्या सदैव खास ठरल्या. अनेक राष्ट्रीय आणि आंतरराष्ट्रीय पुरस्कारांनी सन्मानित झालेल्या आशाताईंचा प्रवास प्रेरणादायी ठरला आहे.
आशाताईंच्या निधनाने केवळ बॉलिवूडच नव्हे तर संपूर्ण संगीतविश्वाने एक महान स्वरगंधर्व गमावला आहे. त्यांच्या सुरांची साथ आता कायमची थांबली असली, तरी त्यांच्या आवाजातील जादू सदैव जिवंत राहणार आहे.
मुख्य संपादक; सतीश आकुलवार
