कोरची : सतीश आकुलवार (मुख्य संपादक)
भरधाव ट्रकने ट्रॅक्टरला मागून दिलेल्या भीषण धडकेत दोन जणांचा जागीच मृत्यू झाला असून तिघे जण गंभीर जखमी झाले आहेत. ही दुर्दैवी घटना आज सायंकाळी सव्वापाच वाजताच्या सुमारास कोरचीपासून सुमारे दोन किलोमीटर अंतरावरील मोहगाव फाट्याजवळ घडली.
मिळालेल्या माहितीनुसार, ट्रकचालक मद्यधुंद अवस्थेत वाहन चालवत होता. अपघातानंतर ट्रक चालकाने पळ काढण्याचा प्रयत्न केला मात्र पोलिसांनी पाठलाग करून त्याला ताब्यात घेतले.
या अपघातात सागर कल्लो (१९), रा. झेंडेपार ता. कोरची व कैलास कोवे (३५), रा. मोहगाव ता. कुरखेडा यांचा मृत्यू झाला. तर राजेश गंगबोईर (२८), रा. चमरोटोला ता. मोहल्ला (छत्तीसगड), पुरुषोत्तम मडकाम (५१), रा. चिचोली ता. अर्जुनी मोरगाव जि. गोंदिया हे गंभीर जखमी झाले असून त्यांच्यावर गडचिरोली येथील जिल्हा सामान्य रुग्णालयात उपचार सुरू आहेत. तसेच प्रदीप नैताम हा किरकोळ जखमी झाला असून त्याच्यावर कोरची ग्रामीण रुग्णालयात उपचार सुरू आहेत.
बंधाऱ्याच्या कामावर जात असताना अपघात
जलसंधारण विभागामार्फत झेंडेपार गावाजवळ बंधाऱ्याचे काम सुरू असून त्या कामासाठी चांदोना येथून सेंट्रींग साहित्य घेऊन एमएच-४०-बी-९५७३ क्रमांकाचा ट्रॅक्टर जात होता. त्याच वेळी हैदराबादहून कोरचीमार्गे रायपूरकडे जाणाऱ्या सीसी-०७-बीए-९२८४ क्रमांकाच्या ट्रकने मोहगाव फाट्याजवळ ट्रॅक्टरला मागून जोरदार धडक दिली.
धडकेची तीव्रता इतकी भीषण होती की ट्रॅक्टर उलटून चार मजूर खाली दबले तर एक जण बाहेर फेकला गेला. ट्रॅक्टरचा अक्षरशः चेंदामेंदा झाला.
नागरिक व पोलिसांची तत्पर मदत
घटनेची माहिती मिळताच मोहगाव येथील नागरिकांनी मदतीसाठी धाव घेतली. तसेच बेळगाव पोलिस मदत केंद्राचे प्रभारी अधिकारी दिनेश खटोले, कोरचीचे पोलिस निरीक्षक शैलेंद्र ठाकरे, उपनिरीक्षक मुकुंद देशमुख यांनी घटनास्थळी पोहोचून जखमींना तत्काळ रुग्णालयात हलविले.
जखमींवर डॉ. चेतना सिडाम व डॉ. शिव पुंडे यांनी प्रथमोपचार केले. मात्र कोरची ग्रामीण रुग्णालयाची १०८ रुग्णवाहिका दुरुस्तीसाठी चंद्रपूर येथे गेल्याने कुरखेडा येथून रुग्णवाहिका बोलावून जखमींना गडचिरोली येथे हलविण्यात आले.
या अपघातामुळे परिसरात हळहळ व्यक्त होत असून मद्यधुंद वाहनचालकांवर कठोर कारवाईची मागणी नागरिकांकडून केली जात आहे.
मुख्य संपादक; सतीश आकुलवार
