मूल : सतीश आकुलवार (मुख्य संपादक)
मूल शहरात प्रतिबंधित सुगंधित तंबाखूच्या व्यवसायाला पुन्हा उधाण आले असून या प्रकरणात पोलिसांच्या भूमिकेबाबत गंभीर प्रश्न उपस्थित होत आहेत. लखन नावाच्या व्यक्तीकडून शहरातील विविध पानठेले व किरकोळ विक्रेत्यांना खुलेआम सुगंधित तंबाखूचा पुरवठा सुरू असल्याची माहिती समोर येत आहे.
काही महिन्यांपूर्वी राजोली येथील एका घरात असलेल्या गोडाऊनवर स्थानिक गुन्हे शाखेने (LCB) धाड टाकून मोठ्या प्रमाणात सुगंधित तंबाखू जप्त केला होता. त्या कारवाईनंतर लखन फरार झाला होता. पोलिसांनी त्याच्याविरुद्ध गैरजामिनपात्र वॉरंट काढले होते. नंतर न्यायालयातून जामीन घेतल्यानंतर तो पुन्हा शहरात सक्रिय झाल्याचे बोलले जात आहे.
दरम्यान काही दिवसांपूर्वी स्थानिक गुन्हे शाखेचे काही कर्मचारी मूल येथील गांधी चौक परिसरात आले होते. यावेळी त्यांनी लखनची प्रत्यक्ष भेट घेऊन चर्चा केल्याची माहिती समोर आली आहे. मात्र या भेटीनंतरही कोणतीही कारवाई न झाल्याने नागरिकांमध्ये विविध चर्चांना उधाण आले आहे.
शासनाने प्रतिबंधित केलेल्या सुगंधित तंबाखूची शहरात खुलेआम विक्री सुरू असताना संबंधितांवर कारवाई का होत नाही? LCB कर्मचाऱ्यांची भेट नेमकी कोणत्या कारणासाठी होती? असा सवाल आता नागरिक उपस्थित करत आहेत.
कारवाईकडे नागरिकांचे लक्ष
आरोग्यास घातक व बंदी असलेल्या पदार्थांची विक्री थांबवण्यासाठी पोलीस प्रशासन, अन्न व औषध विभाग आणि संबंधित यंत्रणांनी तातडीने संयुक्त कारवाई करावी, अशी मागणी नागरिकांकडून होत आहे.
मुख्य संपादक; सतीश आकुलवार
