धानोरा : सतीश आकुलवार (मुख्य संपादक)
गडचिरोली जिल्ह्यातील धानोरा तालुक्यातील मेंढा (लेखा) गावालगतच्या जंगलातून सागवान व बिजा वृक्षांची अवैधरित्या तोड केल्याप्रकरणी वनविभागाने तिघांना अटक केली असून न्यायालयाने त्यांना ३० मार्चपर्यंत वनकोठडी सुनावली आहे.
अटक करण्यात आलेल्यांची नावे चिन्नू रैनू दुगा, कालिदास बिड्डू आतला आणि संतोष देवराव तोफा अशी आहेत.
दि. २६ मार्च रोजी मेंढा येथील वनरक्षक एच. के. मडावी आणि क्षेत्र सहायक ए. के. गांगरेड्डीवार हे दुधमाळा परिसरात गस्त घालत असताना मेंढा गावालगत संतोष तोफा यांच्या शेतात सागवान व बिजा प्रजातीची झाडे पडलेली आढळून आली. तपासात ही झाडे जंगलातून अवैधरित्या तोडून आणल्याचे स्पष्ट झाले.
या कारवाईदरम्यान वनाधिकाऱ्यांनी १९ सागवान व २ बिजा प्रजातीची लाकडे जप्त केली. भारतीय वन अधिनियम १९२७ अंतर्गत गुन्हा नोंदवून तिघांना अटक करण्यात आली आहे.
प्राथमिक चौकशीत आरोपींनी ही लाकडे सामूहिक वनहक्कप्राप्त गावाशेजारील जंगलातून आणल्याची शक्यता व्यक्त होत असून, या प्रकरणात इतर गावांतील काही व्यक्तींचाही सहभाग असण्याची शक्यता वनविभागाने वर्तवली आहे.
ही कारवाई उपवनसंरक्षक आर्या व्ही. एस. व सहायक वनसंरक्षक अंबरलाल मडावी यांच्या मार्गदर्शनाखाली दक्षिण धानोराचे वनपरिक्षेत्र अधिकारी सुमित पुरमशेट्टीवार व त्यांच्या पथकाने केली.
मुख्य संपादक; सतीश आकुलवार
