मुलमध्ये रंगणार भव्य गरबा महोत्सव; प्राजक्ता माळी ठरणार खास आकर्षण
सांस्कृतिक पर्वाची मेजवानी! प्राजक्ता माळी येणार मुल तालुक्यातील गरबा महोत्सवात
मुल : सतीश आकुलवार (मुख्य संपादक)
राज्याचे माजी वने, सांस्कृतिक कार्य व मत्स्यव्यवसाय मंत्री तथा आमदार श्री. सुधीर मुनगंटीवार यांच्या पुढाकारातून ‘भाऊंचा गरबा महोत्सव’ रंगणार असून या महोत्सवाचे प्रमुख आकर्षण ठरणार आहे सुप्रसिद्ध अभिनेत्री प्राजक्ता माळी.
हा भव्य सोहळा मुल येथील तालुका क्रीडा संकुलात साजरा होत असून, स्व. चांगुणाबाई सच्चिदानंद मुनगंटीवार सेवा समितीच्या वतीने २२ सप्टेंबर ते २ ऑक्टोबर या कालावधीत या महोत्सवाचे आयोजन करण्यात आले आहे. दररोज मोठ्या प्रमाणावर भाविक व नागरिकांची गर्दी होत असून, भव्य समूह गरबा-दांडिया स्पर्धेमुळे वातावरण अधिक रंगतदार झाले आहे.
दि. १ ऑक्टोबरला सायंकाळी ५ ते रात्री १० या वेळेत प्राजक्ता माळी महोत्सवात उपस्थित राहणार आहेत.
संध्याकाळी ७.३० वाजता त्या बेंबाळ येथे देवी जागरणाला उपस्थित राहतील.
त्यानंतर रात्री ८.३० ते १० दरम्यान त्या मुल तालुका क्रीडा संकुलातील गरबा महोत्सवात सहभागी होतील.
आकर्षक रोषणाई, रंगीबेरंगी सजावट आणि पारंपरिक तालावर नाचणारा गरबा यामुळे संपूर्ण मुल तालुका उत्साहात न्हाऊन निघाला आहे. नागरिकांमध्ये प्राजक्ता माळींच्या आगमनाची उत्सुकता शिगेला पोहोचली आहे.
मुख्य संपादक; सतीश आकुलवार
