चंद्रपूर : सतीश आकुलवार (मुख्य संपादक)
महापालिका निवडणुकीच्या पार्श्वभूमीवर चंद्रपूर भाजपमध्ये अखेर मोठी शिस्तभंगाची कारवाई करण्यात आली आहे. सुभाष कासनगोटूवार, चंद्रपूर महानगर भाजप अध्यक्ष, यांची तात्काळ पदावरून हकालपट्टी करण्यात आली आहे.
भाजप महाराष्ट्र प्रदेश कार्यालयाचे सचिव मुकुंद कुलकर्णी यांच्या सहीने आज ३१ डिसेंबर २०२५ रोजी अधिकृत पत्र पाठवण्यात आले असून, त्या पत्रात कासनगोटूवार यांना आजपासून चंद्रपूर महानगर अध्यक्षपदावरून पदमुक्त करण्यात येत असल्याचे स्पष्ट नमूद आहे. या आदेशाची प्रत विदर्भ विभाग संघटन मंत्री डॉ. उपेंद्र कोठेकर यांनाही पाठवण्यात आली आहे.
या अचानक घेतलेल्या निर्णयामुळे भारतीय जनता पार्टीच्या स्थानिक राजकारणात खळबळ उडाली असून, महापालिका निवडणुकीआधी पक्षांतर्गत शिस्त आणि संघटनात्मक नियंत्रण मजबूत करण्याचा संदेश देण्यात आल्याचे बोलले जात आहे. कारवाईमागील नेमकी कारणे पत्रात नमूद नसली, तरी अंतर्गत शिस्तभंग आणि पक्षरेषेच्या विरोधातील कृतींवर कठोर भूमिका घेण्यात आल्याची चर्चा राजकीय वर्तुळात सुरू आहे.
दरम्यान, या निर्णयानंतर चंद्रपूर महानगर भाजपच्या पुढील नेतृत्वाबाबत तातडीने निर्णय घेतला जाण्याची शक्यता असून, निवडणूक रणनितीवर त्याचा काय परिणाम होतो याकडे सर्वांचे लक्ष लागले आहे.
मुख्य संपादक; सतीश आकुलवार
