मूल : भगवान मोहुर्ले (तालुका प्रतिनिधी,)
दिनांक 9 ऑक्टोबर, गुरुवार रोजी तालुका क्रीडा संकुल, मूल येथे गोंडवाना विद्यापीठाच्या आंतरमहाविद्यालयीन वेटलिफ्टिंग, पॉवरलिफ्टिंग आणि बेस्ट फिजिक्स क्रीडा स्पर्धेचे आयोजन करण्यात आले. या स्पर्धेचे आयोजन ग्रुप ऑफ फिट लिफ्टरचे संचालक व एन.आय.एस. कोच करण सुरेश कोसरे यांच्या मार्गदर्शनाखाली करण्यात आले.
गोंडवाना विद्यापीठ अंतर्गत चंद्रपूर व गडचिरोली जिल्ह्यातील कर्मवीर महाविद्यालय, मूल, डॉ. खत्री महाविद्यालय, तुकूम, डॉ. शांताराम पोटदुखे महाविद्यालय, सरदार पटेल महाविद्यालय, चिंतामणी महाविद्यालय, घुघूस, आनंद निकेतन महाविद्यालय, वरोरा यांसह तीस ते चाळीस महाविद्यालयांतील खेळाडूंनी या स्पर्धेत सहभाग नोंदविला.
स्पर्धेचे उद्घाटन गोंडवाना विद्यापीठाच्या शारीरिक शिक्षण विभागाच्या संचालिका डॉ. अनिता लोखंडे यांच्या हस्ते झाले. अध्यक्षस्थानी श्री. अखिलभाऊ गांगरेडिवार (अध्यक्ष, कृषी उत्पन्न बाजार समिती, मूल) होते, तर प्रमुख पाहुणे म्हणून श्री. धर्मेंद्रभाऊ सूत्रपवार आणि श्री. राकेशभाऊ सातपैसे उपस्थित होते.
उद्घाटनानंतर लगेच स्पर्धेला प्रारंभ झाला. विविध वजनी गटांमध्ये खेळाडूंनी उत्कृष्ट कामगिरी करत पहिला क्रमांक पटकाविला. तालुका क्रीडा संकुल प्रशिक्षण केंद्रातील महिमा वाघ आणि आचल करंजेकर यांनी आपल्या वजनी गटात प्रथम क्रमांक पटकावत गोंडवाना विद्यापीठाचे नाव उज्ज्वल केले. हे विजेते खेळाडू आता अखिल भारतीय आंतरविद्यापीठीय स्पर्धेत गोंडवाना विद्यापीठाचे प्रतिनिधित्व करणार आहेत.
स्पर्धा कोणत्याही तांत्रिक अडचणीशिवाय यशस्वीपणे पार पडली. याचे श्रेय प्रशिक्षक करण कोसरे यांना दिले जात आहे. स्पर्धेच्या आयोजनात अमोल आवडे, आकाश चौधरी, पंकज बेले, दीपक भांडारकर, विष्णूवर्धन येरमी, भूषण देशमुख, शार्विल देअरकर, आकाश भाऊ यांनी पंच व तांत्रिक अधिकारी म्हणून सहकार्य केले.
स्पर्धा यशस्वीपणे पार पाडल्याबद्दल डॉ. अनिता लोखंडे मॅडम यांनी करण कोसरे यांचा सन्मानचिन्ह देऊन गौरव केला.
या प्रसंगी तालुका क्रीडा अधिकारी श्री. विनोद ठीकरे, तालुका क्रीडा संयोजक श्री. नामदेव पिजुरकर, डॉ. आशिष चहारे, डॉ. विक्की पेटकर यांच्यासह सर्व मान्यवर उपस्थित होते. सर्वांनी खेळाडूंना शुभेच्छा देत त्यांना पुढील वाटचालीसाठी प्रोत्साहन दिले.
मुख्य संपादक; सतीश आकुलवार
