गडचिरोली : सतीश आकुलवार (मुख्य संपादक)
गडचिरोली जिल्ह्यात वाढत्या रस्ते अपघातांमुळे नागरिकांच्या जीवितास धोका निर्माण झाला असून, या पृष्ठभूमीवर गडचिरोली विधानसभा क्षेत्राचे आमदार डॉ. मिलिंद नरोटे यांनी जिल्हाधिकारी व पोलिस अधीक्षकांना निवेदन देऊन अपघात नियंत्रणासाठी तातडीने उपाययोजना करण्याची निर्देश दिले.
गेल्या काही महिन्यांत जिल्ह्यात अपघातांची संख्या चिंताजनकरित्या वाढली असून, अनेक निष्पाप नागरिकांना प्राण गमवावे लागले आहे. अपघातांमुळे अनेक कुटुंबांवर दुःखाचा डोंगर कोसळला आहे. या गंभीर परिस्थितीला प्रशासनाने गांभीर्याने घेत तात्काळ पुढील उपाययोजना कराव्यात, असेही आमदार डॉ. नरोटे यांनी निवेदनात नमूद केले आहे.
अवजड वाहने व ट्रक यांना वेगमर्यादेचे कठोर पालन बंधनकारक करावे, महामार्ग व मुख्य रस्त्यांवरील अवैध पार्किंग हटवून अधिकृत पार्किंगची व्यवस्था करावी, गर्दीच्या वेळेत वर्दळीच्या ठिकाणी वाहतूक नियंत्रणात ठेवावी, अपघातप्रवण ठिकाणांची तातडीने दुरुस्ती करावी, स्पीड गन, ड्रायव्हर टेस्ट व ब्रेथ अॅनालाईझर यंत्रणा प्रभावीपणे वापराव्यात, वाहनचालकांसाठी जनजागृती व प्रशिक्षण मोहीम राबवावी, अपघातग्रस्तांना नुकसान भरपाई मिळण्यासाठी आवश्यक ती प्रशासनिक कार्यवाही करावी, गडचिरोली शहरात व जिल्हाभरात वाहतूक पोलिसांची संख्या वाढवावी व ते 24 तास कार्यरत राहतील यासाठी आवश्यक ती व्यवस्था करावी, गडचिरोलीतील जनतेचे प्राण वाचवणे ही आपली सामूहिक जबाबदारी आहे. त्यामुळे प्रशासनाने तातडीने पावले उचलून प्रभावी अंमलबजावणी करावी, असेही आमदार डॉ. नरोटे यांनी म्हटले.
याप्रसंगी भाजपा जिल्हाध्यक्ष प्रशांत वाघरे, ओबीसी मोर्चाचे जिल्हाध्यक्ष अनिल पोहनकर, भाजयुमो जिल्हाध्यक्ष अनिल तिडके, भाजयुमो जिल्हा महामंत्री मंगेश रणदिवे, शिवसेना जिल्हा संयोजक हेमंत जम्बेवार, भाजपा शहराध्यक्ष अनिल कुनघाडकर, भाजयुमो शहराध्यक्ष विशाल हरडे, विजय कृपाकर, आशिष मेश्राम व इतर कार्यकर्ते उपस्थित होते.
मुख्य संपादक; सतीश आकुलवार
