मूल : सतीश आकुलवार (मुख्य संपादक)
नगर परिषदेच्या प्रशासकीय कार्यकाळात झालेल्या आर्थिक व्यवहारांची चौकशी करण्यासाठी विशेष ऑडिट करण्यात यावे, अशी मागणी नगरसेविका सौ. प्राची आनंद आक्केवार यांनी केली आहे. याबाबत त्यांनी नगर परिषद अध्यक्षांना लेखी निवेदन सादर केले आहे.
निवेदनात नमूद केल्याप्रमाणे, मूल नगर परिषदेची पंचवार्षिक निवडणूक न झाल्याने १ जानेवारी २०२२ ते ५ जानेवारी २०२६ या कालावधीत प्रशासकांच्या माध्यमातून कारभार चालविण्यात आला. या काळात शासनाकडून नगर विकासासाठी मोठ्या प्रमाणात निधी उपलब्ध झाला होता. मात्र, या निधीचा योग्य वापर झाला का, तसेच प्रलंबित समस्या सोडविण्यात प्रशासन अपयशी ठरल्याची शंका व्यक्त करण्यात आली आहे.
याशिवाय, विविध विकासकामांसाठी खर्च करण्यात आलेल्या निधीबाबत नागरिक व लोकप्रतिनिधींमध्ये संभ्रम निर्माण झाला असून, निधीच्या वापराबाबत पारदर्शकता नसल्याची टीका देखील करण्यात आली आहे. सार्वजनिक निधीचा योग्य हिशेब नागरिकांसमोर यावा, यासाठी या कालावधीतील संपूर्ण आर्थिक व्यवहारांचे विशेष ऑडिट करणे आवश्यक असल्याचे निवेदनात नमूद आहे.
तसेच, या प्रकरणी संबंधित अधिकाऱ्यांवर योग्य ती कारवाई करावी आणि संपूर्ण माहिती नागरिकांसमोर मांडावी, अशी मागणीही करण्यात आली आहे. या निवेदनाची प्रत आमदार तसेच जिल्हाधिकारी यांनाही पाठविण्यात आली आहे.
मुख्य संपादक; सतीश आकुलवार
