मूल : सतीश आकुलवार (मुख्य संपादक)
चंद्रपूर जिल्ह्यातील मूल तालुक्यातील भगवानपूर रेतीघाटावरून सध्या मोठ्या प्रमाणात अवैध रेती तस्करी सुरू असल्याचे चित्र समोर येत आहे. दिवस-रात्र ट्रॅक्टर च्या माध्यमातून रेतीची वाहतूक केली जात असून याकडे महसूल विभागाचे मात्र पूर्णपणे दुर्लक्ष होत असल्याची चर्चा परिसरात सुरू आहे.
स्थानिकांच्या माहितीनुसार, रात्रीच्या वेळी मोठ्या प्रमाणात रेती उपसा करून ती विविध ठिकाणी नेली जात आहे. या अवैध व्यवसायामुळे शासनाचा लाखो रुपयांचा महसूल बुडत असून पर्यावरणालाही मोठा धोका निर्माण झाला आहे. नदीपात्रात मोठ्या प्रमाणात खोदकाम होत असल्याने परिसरातील शेतजमिनी व पाण्याच्या प्रवाहावरही परिणाम होत असल्याची चिंता नागरिकांनी व्यक्त केली आहे.
गावकऱ्यांनी याबाबत अनेकदा तक्रारी केल्याचा दावा केला असला तरी संबंधित विभागाकडून कोणतीही ठोस कारवाई होत नसल्याने प्रशासनाच्या कार्यक्षमतेवर प्रश्नचिन्ह उपस्थित होत आहे.
दरम्यान, भगवानपूर रेतीघाटावर सुरू असलेल्या या अवैध रेती तस्करीवर महसूल विभागाने तात्काळ लक्ष देऊन कारवाई करावी, अशी मागणी स्थानिक नागरिकांकडून करण्यात येत आहे.
मुख्य संपादक; सतीश आकुलवार
