मूल : सतीश आकुलवार (मुख्य संपादक)
शहरात सुगंधित तंबाखूच्या अवैध व्यवसायाबाबत प्रसिद्ध झालेल्या बातमीनंतर संबंधित प्रकरणाला नवीन वळण मिळाले असून, मुख्य आरोपी लखन मानकानी याने न्यूज 7 मराठीचे संपादक सतीश आकुलवार यांच्याशी संपर्क साधण्याचा प्रयत्न केल्याची माहिती समोर आली आहे.
काही दिवसांपूर्वी मूल शहर परिसरात सुगंधित तंबाखूचा व्यवसाय मोठ्या प्रमाणात सुरू असल्याची बातमी प्रसारित झाली होती. संबंधित कारवाईदरम्यान लखन मानकानी फरार झाल्याची माहिती होती. त्यानंतर न्यायालयातून जामीन मिळाल्यानंतर त्याने पुन्हा आपला व्यवसाय पूर्ववत सुरू केल्याची चर्चा स्थानिक स्तरावर सुरू आहे.
दरम्यान, या संपूर्ण प्रकरणात पोलिस प्रशासनाच्या भूमिकेबाबत नागरिकांमध्ये प्रश्नचिन्ह निर्माण झाले आहे. काही दिवसांपूर्वी स्थानिक गुन्हे शाखेचे (LCB) कर्मचारी मूल येथील गांधी चौक परिसरात लखन मानकानी याची भेट घेतल्याची माहितीही पुढे आली असून, या भेटीमुळे चर्चेला अधिक उधाण आले आहे.
विशेष म्हणजे, सदर बातमी प्रसारित झाल्यानंतर लखन मानकानी याने न्यूज 7 मराठीचे संपादक सतीश आकुलवार यांच्याशी सलग तीन वेळा संपर्क साधण्याचा प्रयत्न केल्याचे समजते. मात्र या संपर्कामागील नेमके कारण अद्याप स्पष्ट झालेले नाही.
दरम्यान, शहरात खुलेआम सुरू असलेल्या सुगंधित तंबाखू विक्रीवर कठोर कारवाई करण्याची मागणी नागरिकांकडून होत असून, संबंधित विभागाने या प्रकरणाची गंभीर दखल घेऊन चौकशी करावी, अशी मागणी पुढे येत आहे.
मुख्य संपादक; सतीश आकुलवार
