मूल : सतीश आकुलवार (मुख्य संपादक)
आज रात्री अंदाजे दीड वाजताच्या सुमारास फिस्कुटी परिसरात वाघाने हल्ला करून एका मेंढपाळाला ठार केल्याची दुर्दैवी घटना घडली. या घटनेमुळे परिसरात भीतीचे वातावरण निर्माण झाले आहे.
मिळालेल्या माहितीनुसार, वासुदेव गणपत कंकलवार (वय 36 वर्ष) रा. जुनासूर्ला हे मेंढपाळ असून मेंढ्यांची लाग बसवून झोपले होते. त्यांच्यासोबत त्यांचे भाऊ मारोती कंकलवार यांची पत्नी वनिता देखील उपस्थित होत्या.
फिस्कुटी येथील महाकाली मंदिराजवळ रामदास जेंगठे यांच्या शेतात मेंढ्यांची लाग बसवून ते झोपले असताना दबा धरून बसलेल्या वाघाने अचानक हल्ला केला. या हल्ल्यात वासुदेव कंकलवार यांचा जागीच मृत्यू झाला.
घटनेची माहिती मिळताच पोलीस विभाग, वन विभाग तसेच फिस्कुटी येथील सरपंच नितीन गुरनुले यांनी तातडीने घटनास्थळी धाव घेतली. त्यानंतर मृतदेह ताब्यात घेऊन पुढील प्रक्रिया करण्यासाठी मूल येथील उपजिल्हा रुग्णालयात शवविच्छेदनासाठी पाठविण्यात आला आहे.
दरम्यान, या घटनेमुळे परिसरातील नागरिकांमध्ये भीतीचे वातावरण निर्माण झाले असून वाघाचा बंदोबस्त करण्याची मागणी ग्रामस्थांकडून होत आहे.
मुख्य संपादक; सतीश आकुलवार
