चंद्रपूर : सतीश आकुलवार (मुख्य संपादक)
चंद्रपूर महानगरपालिकेच्या स्थायी समिती सभापतीपदी शिवसेना (उद्धव बाळासाहेब ठाकरे) पक्षाच्या मनस्वी संदीप गिऱ्हे यांची ईश्वरचिठ्ठीद्वारे निवड झाली. त्यांनी काँग्रेसचे नगरसेवक वसंता देशमुख यांचा पराभव केला.
गिऱ्हे यांच्या विजयामुळे महानगरपालिकेत महापौर, उपमहापौर आणि स्थायी समिती सभापती अशी तिन्ही महत्त्वाची पदे आता सत्ताधारी भाजप व शिवसेना (ठाकरे गट) युतीकडे आली आहेत.
यापूर्वी महापौर व उपमहापौर पदाच्या निवडणुका राज्यभर चर्चेत आल्या होत्या. त्यामुळे स्थायी समिती सभापती पदाच्या निवडणुकीकडेही सर्वांचे लक्ष लागले होते. या पदासाठी शिवसेना (उद्धव बाळासाहेब ठाकरे) पक्षाकडून नगरसेविका मनस्वी गिऱ्हे तर काँग्रेसकडून वसंता देशमुख यांनी उमेदवारी अर्ज दाखल केला होता. त्यामुळे दोघांमध्ये थेट लढत झाली.
एकूण १६ सदस्य असलेल्या स्थायी समितीत सत्ताधारी भाजप–शिवसेना आणि विरोधी काँग्रेस–जनविकास सेना युतीचे प्रत्येकी ८ सदस्य होते. त्यामुळे निकालाबाबत शेवटपर्यंत उत्सुकता कायम होती. भाजपचे माजी मंत्री आमदार सुधीर मुनगंटीवार आणि आमदार किशोर जोरगेवार यांच्या गटाचे अनुक्रमे दोन आणि चार सदस्य असल्याने या निवडणुकीत त्यांची भूमिका महत्त्वाची मानली जात होती.
दरम्यान भाजप प्रदेशाध्यक्ष रवींद्र चव्हाण यांनी शिवसेनेच्या मनस्वी गिऱ्हे यांनाच मतदान करण्याच्या सूचना दिल्याचे पत्र आल्यानंतर भाजपच्या सदस्यांमध्ये हालचाली सुरू झाल्या आणि सर्व सदस्य एकत्र आले. अखेर झालेल्या मतदानात दोन्ही उमेदवारांना समान मते पडल्याने ईश्वरचिठ्ठी काढण्यात आली. त्यामध्ये मनस्वी संदीप गिऱ्हे यांचे नाव निघाल्याने त्यांची स्थायी समिती सभापतीपदी निवड निश्चित झाली.
मुख्य संपादक; सतीश आकुलवार
