चंद्रपूर : सतीश आकुलवार (मुख्य संपादक)
गेल्या काही दिवसांपासून नाट्यमय घडामोडी आणि राजकीय वादांमुळे चर्चेत असलेल्या चंद्रपूर महानगरपालिकेत अखेर भाजपचा महापौर निवडून आला आहे. मंगळवारी झालेल्या महापौर पदाच्या निवडणुकीत भाजपच्या संगीता खांडेकर यांनी काँग्रेसच्या उमेदवार सोनाली महाडूळे यांचा केवळ एका मताने पराभव करत बाजी मारली.
या निवडणुकीत ठाकरे गटाने भाजपला पाठिंबा दिल्याने सत्ता समीकरण बदलले. त्यानुसार प्रशांत दानव (ठाकरे गट) यांची उपमहापौरपदी निवड झाली आहे.
महापौर पदाच्या निवडणुकीवेळी 66 सदस्यसंख्या असलेल्या सभागृहात वंचित बहुजन आघाडीचे दोन नगरसेवक अनुपस्थित राहिले, तर एमआयएमच्या एका नगरसेवकाने तटस्थ राहण्याचा निर्णय घेतला. त्यामुळे बहुमताचा आकडा 32 पर्यंत खाली आला. भाजपच्या संगीता खांडेकर यांना 32 मते मिळाली, तर काँग्रेसच्या सोनाली महाडूळे यांना 31 मते मिळाली. परिणामी काँग्रेसची सत्ता अवघ्या एका मताने हुकली.
महापालिका निवडणुकीत काँग्रेस हा सर्वात मोठा पक्ष ठरला होता. 66 जागांपैकी काँग्रेसला 27, भाजपला 23, ठाकरे गटाला 6, शेकाप 3, वंचित 2, अपक्ष 2, बसपा 1, तर शिंदे सेना आणि एमआयएम प्रत्येकी 1 जागा मिळाली होती. मात्र कोणालाही स्पष्ट बहुमत न मिळाल्याने महापालिकेत त्रिशंकू स्थिती निर्माण झाली होती आणि सत्ता स्थापनेसाठी ठाकरे गट निर्णायक ठरला.
दरम्यान, काँग्रेसमधील अंतर्गत गटबाजीही उघड झाली. विजय वडेट्टीवार आणि प्रतिभा धानोरकर यांच्या गटातील सत्तासंघर्षामुळे तोडगा न निघाल्याने पक्षाची भूमिका कमकुवत झाली. त्यातच ठाकरे गटाने महापौर पदाची मागणी केल्याने काँग्रेसच्या हातून सत्ता निसटली.
शेवटी ठाकरे गटाने भाजपसोबत तडजोड करत सव्वा-सव्वा वर्षांचा फॉर्म्युला मान्य केला. त्यानुसार पहिल्या सव्वा वर्षासाठी महापौरपद भाजपकडे, तर उपमहापौरपद ठाकरे गटाकडे देण्यात आले आहे.
मुख्य संपादक; सतीश आकुलवार
