मुल : सतीश आकुलवार (मुख्य संपादक)
शहरातील गांधी चौक परिसरातील एका पेट्रोल पंपावर डिझेल विक्रीमध्ये होत असलेल्या कथित अनियमिततेविरोधात भारतीय राष्ट्रीय मजदूर काँग्रेस (INTUC) संघटनेने आक्रमक भूमिका घेत तहसीलदारांना निवेदन सादर केले. जिल्हाध्यक्ष दत्तात्रय समर्थ यांच्या नेतृत्वाखाली हे निवेदन देण्यात आले.
निवेदनात नमूद करण्यात आले आहे की, संबंधित पेट्रोल पंपावर सामान्य नागरिक व शेतकऱ्यांना डिझेल उपलब्ध नसल्याचे सांगितले जाते. “मर्यादित स्टॉक आहे”, “तहसील कार्यालयासाठी २००० लिटर डिझेल राखीव ठेवणे आवश्यक आहे” अशी कारणे देत अनेकांना डिझेल देण्यास नकार दिला जात असल्याचा आरोप करण्यात आला आहे. तर दुसरीकडे काही व्यावसायिक वाहनांना मोठ्या प्रमाणात डिझेल पुरवठा होत असल्याचेही सांगण्यात आले.
या प्रकारामुळे शेतकरी व सर्वसामान्य नागरिकांना आर्थिक व मानसिक त्रास सहन करावा लागत असून शेतीची कामेही प्रभावित होत असल्याचा दावा INTUC कडून करण्यात आला आहे. या प्रकरणाची सखोल चौकशी करून दोषींवर कारवाई करावी, अशी मागणी निवेदनातून करण्यात आली आहे.
संघटनेने प्रशासनाकडे काही महत्त्वाच्या मागण्या देखील मांडल्या आहेत. त्यामध्ये संबंधित पेट्रोल पंपाची तपासणी, स्टॉक व विक्री नोंदींची पडताळणी, सीसीटीव्ही फुटेज तपासणे तसेच “NO DIESEL” बोर्ड लावण्यामागील कारणांची चौकशी करण्याची मागणी करण्यात आली आहे.
दरम्यान, या निवेदनाला परिसरातील नागरिक व शेतकऱ्यांचा पाठिंबा मिळाल्याचेही समोर आले आहे. अनेक नागरिकांनी समर्थन पत्रावर स्वाक्षऱ्या करून प्रशासनाने तातडीने कारवाई करावी, अशी मागणी केली आहे.
मुख्य संपादक; सतीश आकुलवार
