गडचिरोली : सतीश आकुलवार (मुख्य संपादक)
जिल्ह्यात तीन दशकांपासून सुरू असलेल्या दारूबंदीच्या पार्श्वभूमीवर तसेच सामाजिक संघटनांच्या तीव्र विरोधाची दखल घेत प्रशासनाने प्रस्तावित ‘एलटीबी बिव्हरेजेस’ मोहफूल मद्यनिर्मिती प्रकल्पाच्या जनसुनावणीला तूर्तास स्थगिती दिली आहे.
महाराष्ट्र प्रदूषण नियंत्रण मंडळाने ९ मार्च रोजी गडचिरोली जिल्हाधिकारी कार्यालयात आयोजित केलेली जनसुनावणी कायदा व सुव्यवस्थेचा प्रश्न निर्माण होण्याची शक्यता लक्षात घेऊन पुढील आदेशापर्यंत लांबणीवर टाकली आहे. यासंदर्भात मंडळाने जिल्हाधिकाऱ्यांना पत्र पाठवून सुनावणी स्थगित करण्याची सूचना केली आहे.
दोन वर्षांपासून थंडबस्त्यात असलेल्या या वादग्रस्त प्रकल्पासाठी अचानक जनसुनावणी जाहीर होताच गडचिरोली जिल्हाभरातून तीव्र विरोधाचे सूर उमटले होते. दारूबंदी असलेल्या जिल्ह्यात मद्यनिर्मिती प्रकल्प उभारणे म्हणजे सामाजिक आरोग्यावर घाला असल्याची भूमिका विविध सामाजिक संघटना व नागरिकांनी मांडली होती.
जिल्ह्यात ‘मुक्तिपथ’सारख्या व्यसनमुक्ती मोहिमा सुरू असताना अशा प्रकल्पाला परवानगी देऊ नये, असे मत ज्येष्ठ समाजसेवक डॉ. अभय बंग आणि देवाजी तोफा यांनी व्यक्त करत प्रशासनाकडे लेखी आक्षेप नोंदवले होते.
दरम्यान, जनसुनावणी स्थगित झाल्याने मद्यमुक्तीसाठी लढा देणाऱ्या संघटनांना तात्पुरता दिलासा मिळाला असला तरी प्रकल्पाचे भवितव्य अद्याप अनिश्चित असून पुढील निर्णयाकडे संपूर्ण गडचिरोली जिल्ह्याचे लक्ष लागले आहे.
मुख्य संपादक; सतीश आकुलवार
