मूल : सतीश आकुलवार (मुख्य संपादक)
मूल शहरातील वार्ड क्रमांक १७ मध्ये शासकीय मालमत्तेची तोडफोड करून सार्वजनिक पाणीपुरवठा यंत्रणेचा गैरवापर केल्याच्या प्रकरणाची अखेर मूल नगर परिषदने दखल घेतली आहे. या प्रकरणातील आरोपी अरमान बिरजिस शेख व मोनू बिरजिस शेख यांना नगरपरिषदेच्या वतीने कारण दाखवा नोटीस बजावण्यात आली आहे.
नगरपरिषदेच्या अधिकाऱ्यांनी केलेल्या प्राथमिक पाहणीत सार्वजनिक बोअरवेलवरील सबमर्सिबल पंपावरून अनधिकृतरीत्या पाइपलाईन जोडण्यात आल्याचे तसेच यासाठी नगरपालिकेचा सिमेंट रस्ता तोडण्यात आल्याचे निदर्शनास आले आहे. या प्रकारामुळे सार्वजनिक मालमत्तेचे नुकसान होऊन इतर नागरिकांच्या पाणीपुरवठ्यावर परिणाम झाल्याचे नमूद करण्यात आले आहे.
नोटिशीत आरोपींना ठराविक मुदतीत खुलासा सादर करण्याचे आदेश देण्यात आले असून, समाधानकारक उत्तर न दिल्यास नगरपालिका नियमांनुसार कठोर कारवाई, दंड तसेच खर्च वसुली करण्यात येईल, असा इशाराही देण्यात आला आहे.
दरम्यान, या प्रकरणी यापूर्वी भारतीय जनता पार्टीचे मूल शहर अध्यक्ष प्रविण नामदेव मोहुर्ले यांनी निवेदन देत कारवाईची मागणी केली होती. तसेच या प्रकरणाची माहिती मूल पोलीस स्टेशन व जिल्हाधिकारी कार्यालय, चंद्रपूर यांना देण्यात आली होती.
नगरपरिषदेच्या या कारवाईमुळे शहरात समाधान व्यक्त होत असून, पुढील कारवाई काय होते याकडे नागरिकांचे लक्ष लागले आहे.
मुख्य संपादक; सतीश आकुलवार
